إسكندرانى
مرحباً بك معنا فى بيتك الثانى

إسكندرانى


 
الرئيسيةالرئيسية  س .و .جس .و .ج  بحـثبحـث  التسجيلالتسجيل  دخولدخول  

شاطر | 
 

 رباعيات صلاح جاهين

اذهب الى الأسفل 
كاتب الموضوعرسالة
mahmoudherooo
اسكندرانى جديد
اسكندرانى جديد
avatar


مُساهمةموضوع: رباعيات صلاح جاهين   الجمعة فبراير 05, 2010 6:46 am

الدرس انتهى

الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..
ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …
ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس

***

القاهرة في ألف عام
بابنايين ياحدادين ياحجارين
يامبيضين يانقاشين يانجارين
الجميع: ياكل يد طاهرة. تعالوا نبني القاهرة
مقدم العمال : هيلا ليصا علي قول أجدادنا
ماشاء الله علي فن بلادنا
الهرم الأكبر والمادنة
بنيناها ياليلا ليصا
العمال: هيلا ليصا
جوهر: النجم القاهرة في الطالع
واسم القاهرة منه طالع
وأنا جوهر مقدام ومطالع
ما اسمحش فيها بنقيصة
العمال: هيلا ليصا
مقدم العمال : يابني دي اسمها أرض الشمس
كا. هي. رع. بلسان الأمس
وتاريخها بألوفه الخمس
هو احنا في طبعة رخيصة
العمال: هيلا ليصا
مقدم العمال: ياما عواصم أنشأناها
هنا.. ورجعنا بنيناها
بين أعلي الأرض وأدناها
تحكم وعلي الحكمة حريصة
العمال: هيلا ليصا
مقدم العمال: وآدي القاهرة طالعة جعيصة
هيلا ليصا
جوهر: القاهرة نرقي ونبخر
يجعلها المولي اللي مقدر
أسعد م الفسطاط والعسكر
ولا تلقاش ولا تنغيصة
هيلا ليصا
الجميع: يجعلها حكامها خدامها
والعدل ينور أيامها
قيموا الباب ياللا لسلامها
خلوها حصينة وعويصة
هيلا ليصا
(موسيقي اقامة الباب)
اصوات: (بحنان)
يابنايين.. ياحدادين.. ياحجارين..
يامبيضين.. يانقاشين.. يانجارين..
ياكل يد طاهرة..
لكم السلام
م القاهرة

***

البائعون أمام سور القاهرة

الديك: كوكوكوكوكوكو..
اللبان: (غناء)
طازة يالابن.. حليب ياقشطة
السقا: عليه العووووض..
اللبان: صباحكو لابن.. ونهاركو قشطة
السقا: عليه العوووووض..
اللبان والسقا: (يدقان باب القاهرة) ياللي انتو هنا
الحرس: ماحد هنا
السقا: عليه العوووووض..
الخضرية: الكرات العريض
عدس أخضر م الصعيد
الخص الخص
قصب للمص
الورور والجعضيض
افتحوا داحنا الخضرية
جايبين الفيتامينات
الفرارجية: اما احنا يافرارجية
ويانا البروتينات
الجميع: طلوا طلة.. بصوا بصة
والا انتوا ماتعبتوش لسة
من أكل النشويات
(يدقون الباب) ياللي انتو هنا
الحرس: ما حد هنا..
باعة: الحطب الناشف ويانا
العيش الطري
عال ياملانة
الجميع: ياللا ياحراس .. شايلين أقفاص
علي رأسنا وراسنا واجعانا
الحرس: (لا يردون)
باعة: ويانا جماش شغل نجادا
ويانا فطير سمن زيادة
ويانا عسل
ويانان بصل
ويانا فلافل ياسادة
ياللي أنتو هنا. (يدقون)
الحرس: (لا يردون)
الجميع: طيب (طاي. يب)
واحد: ح نخليكو تفتحوا علي طول
ح نخبط كده كده ونقول
الجميع: احنا معانا اذن دخول
بسم المعز لدين الله
الحرس: (يفتحون) وين هو الاذن؟
الباعة: (يعطونهم) آهه..
الحرس: (ينظرون للنقود) معقول معقول
نبقي احنا هنا
الجميع: (يدخلون في نشيد يتخلله خد. هات ادخل.. اتفضل)
درهم باسم الدولة مسكوك
يفتح لك أيها باب مسكوك
(تكرر)
البائع العجوز: (يبحث في ملابسه)
الحرس: الاذن قوام
شهل. عجل
البائع: خد أهه الل.. لله يرحم أبوك..
الحرس: ادخل
البائع: (مناديا في خبث)
القرع القرع الكوسة القرع
في المعزية مد له فرع
الباعة: درهم باسم الدولة مسكوك يفتح لك أيها باب مسكوك
وان كنت جميل وبخصر نحيل
احيانا برضه.. يدخلوك
هأ. أو
(ينتهي الغناء)
الحارس: علي وين ياصبية..
فاطمة: قول والله من فضلك.. مش دي برضه
القاهرة؟
الحارس: أي نعم..
فاطمة: ميرسي (تتجه الي الدخول)
الحراس: ممنوع (يمنعها)

***

صلاة الزين

الحارس : ياصلاة الزين!
الحرس: ياصلاة الزين!
(يغنون)
ياصلاة الزين ياصلاة الزين
علي دي مشية ياصلاة الزين مشية غزلان..
في رقصتها
جنيه وجبان
بيتعاركوا
جوه بستان
بيتخاطفوا
فحلين رمان
بيتسابقوا
علي غصن البان
عشان يسقوا
ورد الخدين
ياصلاة الزين
الحارس: والاسم أيش ياصبية
فاطمة: أنا أسمي فاطمة القاهرية
فاطمة فطمطم
ومصرية.. وخفيفة الدم
أسليكم ولا تحملوا هم
ووصفاتي خافضاهم صم
أداويكم من كل ألم
وأشيلكم بين رمشي والعين
الحرس: ياصلاة الزين!
الحارس: علمك من وين يالأدوية؟
فاطمة: من جدتي الفرعونية
الحارس: ياصلاة الزين ياصلاة الزين
علي فطمطم ياصلاة الزين
ادخلي يانبية
سحرتينا.. من دون رقية
كفاية اسمك.. بركة النيه
يامرحبا بك. فاطمة القاهرية
واسم النبي حارس الاسمين ياصلاة الزين


***

المسحراتي

احمد: راديو القرون الوسطي
ماركة طم طم طم
مسحراتي وأسطي
طبلة وكلام ونغم
ألا يافتي فاعلم
رمضان ثبت فاسهر
ياصاح في الازهر
واشرب من المتجر
مشروبه الأخضر
واجلس بباب الخان
واضحك مع الخلان
خليها منذ الآن
عادة بتتكرر
علي مدي الأعوام
وهذا أول عام
في القاهرة ياهمام
رمضان بينور
رمضان هو القاهرة
والقاهرة رمضان
لياليه تبات ساهرة كما شمعدان ولهان
بعد الصلاة في أناه.. وقراءة القرآن
يسعي الصديق للصديق. وأنا ليا والله صديق
حبيب وعني احتجب. معرف له أي مكان
ويا أمة الاسلام
بكره صيام وقيام
اتسحروا الليلة
ونغنغوا العيلة
وبعودة الأيام
طم طم فطمطم طم
فين أنتي يافطمطم
أحوي أحوي
إياها


***

عيد الفطر

المجموعة: قوم قول لجارك
عيد فطر مبارك
واهدي له طبق من كحك دارك
وتلات تيام ليلك ونهارك
تنك قول.. قول.. قول
(بدء الايقاع الراقص)
عيد فطر مبارك (تكرر 6 مرات)
عيد فطرمبارك
عيد فطرمبارك
عيد فطرمبارك
عيد فطرمبارك
عيد فطرمبارك
عيد فطرمبارك
ياسي علام
المجموعة: عيد فطرمبارك
يابو عرام
الغلبان: وأنا ؟.. وأنا؟..
المجموعة: عيد فطرمبارك
ياتبارك
المجموعة: عيد فطر مبارك
ع الاسلام وكل ملة
المعيدين: عيد فطر ما تياللا علي المصلي
نشوف أمير المؤمنين تحت المظلة
تحن المظلة وقرعته في الشمس الناقحة
ومن جنانه ولحسته وجليه في الضلة
المجموعة: أهو خارج أهه من باب العيد
أهو فايت أهه في ميدان العيد
رايح م القصر لباب النصر
يصلي العيد في مصلي العيد
ياتري متزربن والا سعيد
العالم الله....
المعيدين: عيد فطر مبارك ماشاء الله علي
المصلي
نشوف أمير المؤمنين تحت المظلة
تحت المظلة وقرعته في الشمس الناقحة
ومن جنانه ولحسته وجليه في الضلة
المجموعة: (هامسة)
حاكم علي كيف كيفه وهواه
واسمه الحاكم بأمر الله
لما يفرفش دغري يبقشش
وان جتله الكتمة ياحول الله
يذل في نفسه وفي رعاياه
آخر مذلة
(موسيقي فقط)
المجموعة: أهو راجع أهه
انما فايق..
بيرش المال
ع الخلايق
الحاشية: انحنوا لعلاه
واكبشوا عطاياه
وادعوا له..
المجموعة: يفضل كده رايق
ان شاء الله خمس ست دقايق
كله علي الله
كله علي الله


***

على اسم مصر

الجزء الأول
النخل في العالي والنيل ماشي طوالي
مع***ة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
كني بافتحها زي اللي اتولدت من جديد
على اسم مصر
مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
اسمعها مهموسة والا اسمعها مشخوطه
شبكة رادار قلبي جوه ضلوعي مضبوطة
على اسم مصر
وترن من تاني نفس النبرة في وداني
ومؤشر الفرحة يتحرك في وجداني
وأغاني واحشاني باتذكرها ما لهاش عد
فيه شيء حصل أو بيحصل أوح يحصل جد
أو ربما الأمر حالة وجد واخداني
انا اللي ياما الهوى جابني ووداني
وكلام على لساني جاني لابد اقوله لحد
القمح ليه إسمه قمح اليوم وأمس وغد
ومصر يحرم عليها .. والجدال يشتد
على اسم مصر
ولما زماني رماني عليل
نسيت كل شيء عن حبيبي الجميل
لكن هو أبداً
انا مانساهوش
نسيت مشيته وصوته كان شكله إيه
ورسمة شفايفه
ولمسة إيديه
نسيت نظراته
نسيت لون عينيه
وقوس الحواجب وسهم الرموش
لكن هو أبداً
انا ما انساهوش
نسيت إسمه وحكايته وعرفته فين
وعشنا سوى العمر
والا يومين
وكان م البشر
والا طير بجناحين
نسيت حتى كان له وجود أو مالوش
لكين هو أبداً
أنا ما انساهوش
قطعوا الأغاني وطارت نشرة الأخبار
دارت على كل دار في الكوكب الدوار
يا حاضرين اعلموا الغايبين بأنه في مصر
اتغير الاسم منذ الآن فأصبح .. مصر
ضحك التاريخ ضحكته المشهور بها واندار
ودخل مناقشة مع الجغرافيا عما صار
هل نعترف بالبيان اللي أذيع العصر
أم ننتظر مصر تطرد اسرائيل بالقسر
وساعتها تحصل بكل جدارة يوم النصر
على اسم مصر

على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر

مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر

مصر السما الفزدقي وعصافير معدية
والقلة مملية ع الشباك .. مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر

رحـيـلاً رحـيـلاً بغيـر هـوادة
رحـيلاً فإن الـرحـيل سعـادة
عبادة
إرادة
سيادة
ولادة
رحـيـلا .. إلى أين لـيس يـهـم
ولـيس يـهـم بأي وسيـلة ..
أجيـراً بلقمـتـه في البـواخـر ..
عـلى واحـد من جيـاد القبيلة ..
على مقعـد في ذرى الجـو فـاخـر
وتمـلأ الكـأس بنت جمـيلة ..
على قدمي .. أو بفكري .. أهاجر
أبادر
أغادر
أخاطر
أسافر
ولـكـن إلى أيـن .. لـيس يـهـم
إلى حيث لا تعبـر الأفـق شمس
إلى القـطب .. أو حلقة الاستواء ..
إلى حـيث يـسمـع لـلجـن همس
إلى بـاطـن الأرض أو في الـفضـاء
إلى مـرفـأ الغـد .. أو أرض أمس
أرى كل شيء ومن أين جاء
وافعل ما قاله القدماء
من الفقراء
أو الحكماء
أو الأمراء
أو الأشقياء أو البلهاء فليس يهم
لقد قيل وهو الكلام المهم
اللي يعيش ياما يشوف
واللي يمشي يشوف اكتر
شفت الجبرتي بحرافيش الحسين وبولاق
بان البلد ماشي زي النمس في الأسواق
بالفلاحين ع المداخل من بعيد وقريب
بالأرنؤوط بالشراكسة بكل صنف عجيب
مترصصين سور رهيب مزراق في ريح مزراق
كأنهم لا بشـر ولا خلقـة الخـلاق
ومصر فلاحة تزرق بين رقيب ورقيب
من غير أبو الهول ما ينهض ناهضة شايله حليب
والصبح بدري الجبرتي ينام وقلمه يسيب
على اسم مصر

مصر اللي عمر الجبرتي لم عرف لها عمر
وطلع لقاها مكان مليان عوام وزعر
جعيدية غوغاء يجيبوا تملي وجع الراس
وخليط أفارقه هنادوة روم ملل أجناس
والترك في القلعة والمماليك خدودهم حمر
كان عمرها ستلاف سنة .. كلها سنين خضر
بس الزمان يختلف زي اختلاف الناس
ناس تبني مجد وحضارة وناس بلا احساس
وناس تنام لما يزحف موكب الأحداث
على اسم مصر

أنا اللي اسمي حتحـور .. أنا بنت رع
مثـال الأمـومـة ورمـز الحـنـان
تفـيض حـلمـاتي وتمـلا الـتـرع
وتسـقـي البـشـر كلهـم والغـيـطان
أنـا ربـة الحـب حتـحـور أنـا
أنـا السيـدة المـنـجدة المـغـرميـن
وكـم مـن محـب ف هـواه انـضـنى
دعـاني وطيـبـت خـاطـره الحـزيـن
أنـا طـيبـة انمـا طـبـعي صـعـب
وديعـه .. ولـو ثـرت بـطشـي مـهـول
ما اشـوفش اللي قدامي لو ألف شعب
أدوسـهـم وتجـري دمـاهـم سيـول
ويـوم رع ما فـات بسنـاه في السـما
وكل العيـون خايفـة تنـظر اليـه
وجـالـه القمـر خلقتـه معتـمة
وعـدى قصـاده .. وضـلم عـليه
يا ويـل الـلي فتـح في ابـويا العـظيم
يا ويل من تطاول يا ويل من ضحك
يا ويـلك يا مصـر مصيرك الـيم
أنا اللي اسمي حتحور انا ح امسحك
يحـاول يهـديني رع ما اسمـعـوش
وادمـر واطـيـح في البلاد والعبـاد
أنـا الـطيبـه .. كنت زي الوحـوش
سفـكـت دماء البـنـات والـولاد
دبـحت المحبـين في عـز القبـل
هـدمت المعابد على المنشدين
قلبت على النحـاتين الجبل
حرقت الغيـطان هم والفلاحين
لحد ما رع نـادى ع الآلهة
وقال صـبوا في النهر كل النبيذ
وشفت الميـاه حمرا ومزهزهة
وظنيتها دم الضحايا الـلذيذ
شربت انتقامـاً شربـت شربـت
وأنا بالـعن المفتـري والغبـي
وحبـة بحبـة عن الوعـي غبت
ونمت على النيل في ضي أبي
وقمت .. بكيت من فؤاد أم ثكلى
ونهنهت فوق صدر مصر العريض
على العالم المبدورين جنبي قتـلى
وكان دمعي ينصب في النيـل يفيض
واقول ليه يا مصـر ولادك كـده
يا إمـا المذله يا يتـجبـروا
يا خوفـي يا فـرحة قـلوب الـعدا
ويا نـدمـي لو ما يتغيـروا
ومن يـومها والنيـل في نفس المعاد
يفيض كل عام قبل فصل الخـريف
بلون حمرة الـدم يملا البلاد
ويملا النسـأيـم بعـطر مخـيف
بعطري أنا الـلي اسمي حتحور أنـا
وعـطري مخـيف وحـنون وطـري
يفـرح بس مـرة في كـل سنة
ويهمس يا مصر اذكـري .. واحـذري
نهايته يا مصر اللي كانت أصبحت وخلاص
تمثال بديع وانفه في الطين غاص
وناس من البدو شدوا عليه حبال الخيش
والقرص رع العظيم بقى صاج خبيز للعيش
وساق محارب قديم مبتورة ف أبو قرقاص
ما تعرف اللي بترها سيف والا رصاص
والا الخراب اللي صاب عقل البلد بالطيش
قال ابن خلدون أمم متفسخة تعيش ليش
وحصان صهل صحى جميع الجيش
على اسم مصر

حصان عرابي جميل حصان عرابي أصيل
حصان عرابي رشيق ديله طويل
يسهر مع الخيل طول الليل يتكلم
ويقول أراء رغم إنه ماكانش متعلم
ويقف في عابدين وياخذ زاوية البروفيل
للرسامين يرسموه ونشوفه جيل ورا جيل
ويعدي كالريح على المجاريح ويسلم
وحافره ع الصخر في التل الكبير علم
ولما صابه انفجار القنبلة اتالم
على اسم مصر

والمس حجارة الطوابي وادق بكعابي
يرجع لي صوت الصدى يفكرني بعذابي
يا ميت ندامة على أمة بلا جماهير
ثورتها يعملها جيشها ومالها غيره نصير
والشعب يرقص كأنه عجوز متصابي
إنهض من القبر احكي القصة يا عرابي
يطل لي رافع الطهطاوي م التصاوير
شاحب ومجروح في قلبه وجرح قلبه خطير
وعيونه مغرورقين بيصبوا دمع غزير
على اسم مصر

مالك سلامتك بتبكي ليه يا طهطاوي
قال لك عرابي .. انكسر بسلاح أوروباوي
وسلاح أوروبا ماهواش المدافع بس
ده فكر ناقد مميز للثمين والغث
قلناها ميت ألف مرة ألف مرة بصوت جهير داوي
بس الحماقة لاليها طبيب ولا مداوي
ولا حد م الخلق بالخطر اللي داخل حس
الغفلانين اللي خلوا العقل صابه مس
قالوا الخطر هو فكر أوروبا لو يندس
على اسم مصر

أحسنت في القول صحيح يا ولد يا متنبي
جبت اللي جوه الفؤاد عن مصر متعبى
وحكمت بالعدل لكن بعضنا انظلموا
" يا أمة ضحكت من جهلها الأمم "
العلم كان عندنا من صغره متربي
لكنه هاجر وعدى البحر متخبي
لما الإيران هجموا ثم اليونان هجموا
ثم الرومان دمروا ثم التتار هدموا
ثم الجميع كل واحد جه مسح قدمه
على اسم مصر

أيها الديك رفيع الموضع
يا صفيحاً فوق مسمار يدور
صف لنا فعل الرياح الأربع
قل لنا .. لو كنت تدري ما يدور
قال صه . فالآن ريح الشرق جاءت
تحمل الضوضاء من سوق المزاد
وتغني دون لحن كيف شاءت
أنا ريح الشرق أدعى شهرزاد
أنا أحكي ثم أحكي ثم أحكي
وأمامي السيف كالعشب يميل
وبكائي يتساوى مع ضحكي
طالما كان بأسلوب جميل
ثم ها قد أرسل الغرب رياحه
تزكم الأنف برائحة عجب
وتغني كبغى في مناحة
أنا ريح الغرب لوني كالذهب
أنا صفراء برمل الصحراء
أدفن الخضرة تحتي دون رحمه
أوصدوا الباب بوجهي الحقراء
حسنا فلتصبح القرية فخمة
ثم ها قد اقبلت ريح الجنوب
بدخان الدهن تسري عابقة
وتغني انني أدعي الهبوب
أنا سوداء كبئر المشنقة
أنا سوداء كأفعى هائلة
كرماد النوم ينثر في العيون
كالعرايا في المروج الموحلة
سعداء .. تعساء ..يرقصون
وتأنى برهة ديك الصفيح
يلقط الأنفاس وهو يترنح
دائراً دورته مع كل ريح
وأخيراً صاح كالأسد المجنح
هللويا ..أقبلت ريح الشمال
في غلالات رقاق راعشه
وهي تشدو بحنو ودلال
ها أنا ريح الشمال المنعشة
إنني وردية مثل العسل
ديدمونا .. هكذا يدعونني
قد عبرت البحر يحدوني الأمل
لعطيل أسمر ..
يخنقني !
ومضى ديك الرياح في دعه
من يمين ليسار يتذبذب
وبدا اضحوكة وإمعه
وهو مصلوب شهيد يتعذب
وعلى رأي المثل
الديك الصفيح
بيدوخ ويا الريح
والديك الصفيح
م البيضه بيصيح
ويقول بالصريح
الفكر فوق في الشمال يا الله الحقوه يا ولاد
لحقوه ولاد من ولاد الأغنيا الأسياد
وهم راجعين رموه في الباخرة في البحر
ونزلوا حكموا في ظل الانجليز والقصر
ومصر في الشمس بتغربل كلام منعاد
عن ابن بنت ابن حنت وطارق ابن زياد
والانجليز راضية بالخطباء وخطب الفخر
خطيب يهز الرؤوس وخطيب يهز الخصر
وخطيب يموت موتة الأبطال قتيل القهر
على اسم مصر

والانجليز معجبين بمراسم التأبين
مات مصطفى كامل اتملت البلد صواوين
والمشرقين شوقي جابهم لجل يبكوا عليه
آه لو عرف هم إيه دلوقت وبقم إيه
المشرق الأولاني هو شعب الصين
هزم التخلف بتنظيم اشتراكي رصين
تنظيم يروح اللومان على طول كده برجليه
والمشرق التاني ينحط الحديد في إيديه
مليون شهيد يعني ثورة تخض شوقي بيه
على اسم مصر

هل مصر موميا جميلة صورتها فوق النعش
يعشقها مجنون ينادي عليها ولا تطلعش
هل مصر نار صفصفت والنفخ فيها محال
والأرض نشعت على رمادها استحال أوصال
سألت أنا الرافعي كان عجٌز ولا بيسمعش
لكن عينيه كانوا يحكولي قصص ما اشبعش
يقولولي ماتخافش مصر بخير وعال العال
مصر الجبرتي ومصر الرافعي حال غير الحال
انظر محمد فريد أعظم وأرقى مثال
على اسم مصر

خذ الكتاب في يمينك وانظر الترقيم
عند المحبة وعند الموت في حرف الميم
تلقى محمد فريد بينهم مقيم ع العهد
وتلقى وجهه المدوٌر زي قرص الشهد
مليان حماسة وكياسة وجدعنه وتصميم
على إيه مصمم؟ .. يسهٌم زي كل زعيم
ويقول على الثورة اللي وأدوا ثورته في المهد
أنا بابني في السر شيء صعب المنال كالفهد
على اسم مصر

محلول مركز من السكر في كباية
وف قلبه خيط يتلضم حباية حبايه
سكر نبات بللورات الماظ بتضوي ضي
وتفضل الألماظات تكبر شوي شوي
لحد ما العقد يبقى في الجمال غايه
ده الحزب في الشعب نضرب به المثل آيه
الصلب والسايل الاثنين سوا ياخي
تنظيم محمد فريد في كل قريه وحيٌ
بللوره بتشع بالثورة اللي يومها جيٌ
على اسم مصر

العقد الماظ ورقبة مصر لايقاله
ضيٌع فريد كل أرضه عليه وأمواله
وفجأة حاكموه ويالله نفوه عن الأوطان
وحرب عالمية أولى ووفد م الأعيان
وثورة والانجليز انحطوا وانشالوا
مين اللي نظٌم فلول الشعب ده بحاله
ازاي جميع البلاد تنهض في نفس الآن
القاهرة اسكندرية منفلوط اسوان
وبعيد يا ولداه فريد مرمي وحيد شرقان
على اسم مصر

السيمفونية اسمها الثورة على المحتل
سنة تسعتاشر اتعزفت في كل محل
تأليف محمد فريد ألفها من سنوات
وكتب لها النوتة بوق وبيانو وكمنجات
عزفوها من غير قيادته وجمعهم ما اختل
غير وقت صرف الأجور لما النفر ينذل
من وقتها وغلوشت نغمات على نغمات
وسعد زغلول زعيم مشغول في الانتخابات
يخطب ويضرب يابده يطبع البصمات
على اسم مصر

وف أوضة عريانة فيها كل شيء بردان
رقد فريد وحده بالحمى والهـذيان
وقام وقف ع السرير في تلج المانيا
ينده يا مصر اسمعي اللي مفاق الدنيا
ووصيتي الثورة لاشتراكية والبنيان
ثورة بحق وحقيق مش حركة م الأعيان
ماتغمضوش عن وحوش الغرب ولا ثانية
ح تروح وحوش لنجليز تطلع وحوش تانية
وسقط ونطق الشهادة ونظرته الحانية

***
البنت و الولـــــــــــــد

البنت فارت و الولد خنشر ...
يا داهيه دقّى ! .. ألف بعد الشر ..
يا ريتها كانت نزلة شعبية ،
و الا وجع فى البطن .. يتدبر .
الا اللى نابهم ، كان قضا وصابهم ،
مالوش دوا ، و لا طب ، يا سى أنور .
البنت فى الاعدادى لسّاها ،

كان إيه لزوم الغصن يتدور ...؟
و الا الولد ، ده يا دوب دخل ثانوى ،
ليه خده ينطر شوك ، بدا المنظر ؟
مش لما بس يكملوا علومهم .. ؟
ما كانش يومهم ، يا النهار لا غبر !
لو كان عليا .. لا واد ، و لا بنّيه ،
أخلى فيهم ( مللى ) يتغير ،
غير لما يبقوا أساتذه ، بماهيه ،
و بيت جميل ، مفروش على صغّير


***

الشوارع حواديت

حواديه الحب فيها
وحودايه...عفاريت
اسمعي يا حلوة لما اضحكك

الشارع دا كنا ساكنين فيه زمان
كل يوم يضيق زيادة عن ما كان
اصبح الآن بعد ما كبرنا عليه
زي بطن الأم مالناش فيه مكان

الشوارع حواديت
حودايه الحب فيها
وحودايه...عفاريت
اسمعي يا حلوة لما أضحكك

الشارع دا رحنا فيه المدرسة
اللي باقي منه باقي
واللي مش باقي...اتنسى
كنسوه الكناسين بالمكنسة
ييجي دور لحظة أسى
أنا برضه كمان نسيت

والشوارع حواديت
حودايه الحب فيها
وحودايه...عفاريت
اسمعي يا حلوة لما أضحكك

الشارع دا أوله بساتين
وآخره حيطة سد
ليا فيه قصة غرام ماحكيتش عنها لأي حد
من طرف واحد...وكنت سعيد أوي
بس حراس الشوارع حطوا للحدودته حد

الشوارع حواديت
حودايه الحب فيها
وحودايه...عفاريت
اسمعي يا حلو لما أضحكك

الشارع دا شفتك إنتي ماشية فيه
لابسة جيب...وبلوزة وردي
وعاملة ديل حصان وجيه
اتجاهك اتجاهي...مشينا ليه
والشارع دا زحام وتيه
بس لازم نستميت
والشوارع حواديت
حودايه الحب فيها
وحودايه...عفاريت
واضحكي يا حلوة لما اسمّعك


***

مصر السهرانة ف عيون جاهين

النور ملو الشوارع
و مليون راديو والع
الساعة اتنين صباحا
لكن إيه الموانع ! ..
الخلق رايحة جايه
و الدنيا لسه حيه
مليانه بالهأَو أَو
و زعيق القهوجية
واحد يقول لواحد :
خليك يا عم قاعد
التانى يقول له :
شكرا
ده انا م المغرب مواعد
فيه سهره لسه عندى
فى بيت فلان افندى
ح ناكل حاجة حلوه
و نشرب تمر هندى
و اللى تروح دالقه جردل
فوق حضرة المبجل
طبعا صاحبنا يزعل
و ينفجر شتايم
و الحى كله يوصل
ما بين مصلح و لايم
اللى يقول : يا جماعة
و اللى يقول : يا بهايم
و مطرب الاذاعة
يصرخ ، و ف وجده هايم
و لو طرطقت ودنك ،
فى وسط دى العظايم ،
تسمع مسحراتى ،
بطبله صوتها واطى ،
بيقول :
اصحى يا نايم


***************

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
عجبي !!!


ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي


ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش
عجبي !!


و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
عجبي !!!


انا شاب لكن عمرى الف عام
وحيد لكن بين ضلوعى زحام
خايف لكن خوفى منى انا
اخرس لكن قلبى مليان كلام
عجبى


انا كل يوم اسمع فلان عذبوه
اسرح فى بغداد والجزائر واتوه
ماعجبش من اللى يطيق بجسمه العذاب
واعجب من اللى يطيق يعذب اخوه
عجبى


ياطير ياعالى فى السما طظ فيك
ماتفتكرشى ربنا مصطفيك
برضك بتاكل دودو وللطين تعود
تمص فيه ياحلو ويمص فيك
عجبى


يالى بتبحث عن اله تعبده
بحث الغريق عن اى شى ينجده
الله جميل وعليم ورحمن رحيم
احمل صفاته وانت راح توجده
عجبى


غمض عينيك وامشى بخفة ودلع
الدنيا هى الشابة وانت الجدع
تشوف رشاقتك خطوتك تعبدك
لكن انت لوبصيت لرجليك تقع
عجبى


ياللى انت بيتك قش مفروش بريش
تقوى عليه الريح يصبح مفيش
عجبى عليك حواليك مخالب كبار
وملكش غير منقار
وقادر تعيش وعجبى


شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني .... و إيه العمل
عجبي !!!


أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
عجبي !!


إيش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينة كده
عجبي !!


إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي !!!


سنوات وفايته عليا فوج بعد فوج
واحدة خدتني ابن والتانية زوج
والتالتة أب خدتني .. والرابعة ايه
ايه يعمل اللي بيحدفه موج لموج
وعجبي !!!


يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
عجبي !!!!


علي بعد مليون ميل من أرضنا
من الفراغ الكوني بصيت أنا
لا شفت فرق بين جبال و بحور
و لا شفت فرق ما بين عذاب أو هنا
عجبي !!


إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!


نظرت فوق للنجوم و انا ساير
رجليا عترت في الحفر و الحجاير
بقيت أقول و انا ع التراب: يا سلام
مش بس عبره أخذت لكن عباير
عجبي !!!


- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
و كل ما انظر تحت اخاف انحدف
عجبي !!!!


وقفت بين شطين علي قنطــــــــــــــــــرة
الكدب فين و الصدق فيـــــــــــن يا تري
محتار ح اموت .. الحوت خرج لي وقالي
هو الكلام يتقــــــــــــاس بالمســـــــــــطرة
عجبي !!!


الدنيا أوده كـــــــــــبيره للانتظار
فيها ابن أدم زيه زي الحـــــــمار
الهم واحد .. و الملل مشــــــترك
و مفيش حمار بيحاول الانتـــــحار
عجبي !!


أيوب رماه البين بكل العـــــــــلل
سبع سنين مرضان وعنده شلل
الصــــبر طيب .. صبر أيوب شفاه
بس الأكـــــــــاده مات بفعل الملل
عجبي !!!


نسمة ربيع لكن بتكوي الوشـــــــوش
طيور جميلة بس من غير عشـــوش
قلوب بتخفق إنما وحـــــــــــــــــدها
هي الحياه كده .. كلها في الفاشوش
عجبي !!!!


كروان جريح مضروب شعاع م القمر
سقط من السموات فؤاده انكســـــــــر
جريت عليه قطه علشان تبلعـــــــــــه
أتاريه خيال شعراء و مالهـــــوش أثر
عجبي !!!


ياللي نصحت الناس بشــــــــــــــرب النبيت
مع بنت حلوه .. وعود , وضحك , وحديت
مش كنت تنصحهم منين يكســــــــــــــــبوا
تمن ده كله ؟ ... و الا يمكن نســـــــــــيت
عجبي !!


ما حد في الدنيا واخد جزاتــــــــــــــــــه
و لا حــــــــــــــــد بيفكر في غير لذاذاته
ما تعرفيش يا حبيبتي .. أنا و انتي مين؟
إنتي عروس النيل ... و أنا النيل بذاته
عجبي !!


إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الـــــفرس
الدنيا قالت .. قام خطفها الشيطان
عجبي !!!!


من بين شقوق الشيش و شقشقت لك
مع شهقة العصافير و زقزقـــــــت لك
نهار جديد انا . . قوم نشوف نعــمليه
انا قلت يا ح تقتلني .. يا ح اقــــــــتلك
عجبي !!!


جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي !!!


يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي !!!


أحب أعيش ولو في الغابات
أصحي كما ولدتني أمي و ابات
طائر .. حوان.. حشرة .. بشر ..بس أعيش
محلا الحياة.. حتي في هيئة نبات
عجبي !!


سهير ليالي و ياما لفيت و طفت
و ف ليه راجع في الضلام قمت شفت
الخوف ... كأنه كلب سد الطريق
و كنت عاوز أقتله .. بس خفت
عجبي !!!


كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع إنه فات بدل التاريخ تاريخين
عجبي !!


عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي !!!


رقبه قزازة و قلبي فيها انحشر
شربت كاس و اتنين و خامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
عجبي !!!!


ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!!


ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
عجبي !!


نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر
عجبي !!


علي رجلي دم .. نظرت له ما احتملت
علي إيدي دم.. سألت ليه ؟ لم وصلت
علي كتفي دم.. و حتي علي رأسي دم
أنا كلي دم .. قتلت ؟ ..... والا اتقتلت
عجبي !!


ينبوع و في الحواديت أنا سمعت عنه
إنه عجيب .. و ف وسط لهاليب لكنه
شقيت كما الفرسان طريقي .. لقيت
حتي الخنازير و الكلاب شربوا منه
عجبي !!!!


يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
عجبي !!!


في يوم صحيت شاعر براحة و صفا
الهم زال و الحزن راح و اختفي
خدني العجب و سألت روحي سؤال
أنا مت ؟ و لا وصلت للفلسفة
عجبي !!!


الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه
عجبي !!!


السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
.. و العبد للشهوات .. منين هو حر؟
عجبي !!!


جالك اوان وعرفت مشي الجنايــــــــز
كيف شفتها يا عبد رب اللذايــــــــــــذ
قال : شفت شيل بالحيل فقير أو اميـــر
كما شالوا في الخمامير فواضي القزايز
عجبي !!


سرداب في مستشفي الولاده طويل
صرخات عذاب ورا كل باب وعويل
.. وفي الطــــــريق متزوقين البنات
متزوقـــــــــــــين للحب و المواويل
عجبي !


أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي !!


يا مشرط الجراح أمانة علـــــــــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. و الفضل يرجع إليك
عجبي !!!


كيف شفت قلبي و النبي يا طبيــــــــــــب
همد و مات و الا سامع له دبيـــــــــــــب
قاللي لقيته مختنق بالدمـــــــــــــــــــــوع
و ما لوش دوا غير لمسه من إيد حبيب
عجبي !!!


تسلم يا غصن الخوخ يا عود الحطـــــــــب
بييجي الربيع .. تطلـــــــــــع زهورك عجب
و انا ليه بيمضـــــــــــي ربيع وييجي ربيع
و لسه برضك قلــــــــــــــــــبي حتة خشب
عجبي !!!!


قلبي عليل يا ناس و في الكاس دواه
مديت له إيدي شربت م اللي حــــواه
جنبي الشمال خف .. اليمين اتــــوجع
و إيه يداوي الكبد م اللي كـــــــــــواه
عجبي!!


دي مزكرات و كتبتها من ســـــــــنين
في نوتة زرقا لون بحور الحنيــــــــــــن
عترت فيها .. رميتها في المهمـــــــلات
وقلت صحيح أما صحيح كلام مخبولين
عجبي !


الدنيا من غير الربيع مــــــــيته
ورقة شجر ضعفـــــــانه و مـــفـــــتــته
لا يا جدع غلطان تأمل وشوف
زهر الشتا طالع فــــــــي عز الشـــــتا
عجبي !!!


سمعت نقطة ميه جوه المحيـــــــط
بتقول لنقطه ما تنزليش في الغويط
أخاف عليكي م الغرق .. قلـــــت أنا
ده اللي يخاف م الوعد يبقي عبيط
عجبي !!!


بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!!


فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين يا جدع
قال من بعيد و لسه رايح بعيد
عجبي !!


كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
عجبي !!


النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعة كمان تبطل دلع
عجبي !!!


صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
عجبي !!!!


كرباج سعاده وقلبي منه اجلد
رمح كأنه حصان و لف البلد
و رجع لي نصل الليل و سألني .. ليه
خجلان تقول انك سعيد يا ولد
عجبي !!!


مزيكة هادية الكون فيها انغـــــمر
وصيف و ليل و عقد فل و سم
يا هلتري الناس كلهم مبسوطين
و يا هل تري شايفين جمال القمر ؟
عجبي!!


إنشد يا قلبي غنوتك للجمــــــــــــــــــال
و ارقص في صدري من اليمين للشمال
ما هوش بعيد تفضل لبكره سعيــــــــــد
ده كل يوم فيه الف الف احتمـــــــــــــال
عجبي !!


آه لو انا و محبوب جزنا الفضـــــا
في سفينة وحدينا .. واشيا رضـــا
ساعة صفا تعجبنا نرجع لهــــــــــا
و الهم قبل ما ييجي .. يبقي مضـى
عجبي !!


أنا إله الوجد رب الهيــــــــــــــــام
أضرب بسهم الوهم وهم الغـــــرام
و هم الغرام من كتر ما هو لذيـــــذ
رشقت انا ف صدري جميع السهام
عجبي !!!


حدوته عن جعران و عن خنفســــــــــه
اتقابلوا حوا بعض ساعة مســـــــــــــــا
و لا قال لهم حد اختشوا عيب حـــــرام
و لا حد قال دي علاقة متدنســــــــــــــة
عجبي !!!!


ياللي عرفت الحب يوم و انطــــــــــــوي
حسك تقال مشتاق لنبع الهـــــــــــــــوي
حسك تقول مشتاق لنبع الغــــــــــــــــرام
ده الحب .. مين داق منه قطره...ارتوي
عجبي !!!


زحام و أبواق سيارات مزعجـــــة
للي يطول له رصيف.. يبقي نجـــا
لو كنت جنبي يا حبيبي أنــــــــــــا
مش كنت أشوف إن الحياة مبهجة
عجبي!!


إيديا في جيوبي وقلبي طــــــــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقـــــترب
عجبي !!


يا ميت ندامه ع القلوب الخـــــــــــلا
لا محبة فيها و لا كراهـــــــــــه ولا
حتي يا قلبي الحزن ما عادش فيـــــك
معلهش .. لك يوم برضه راح تتملا
عجبي !!


مرحب ربيع مرحب ربيع مرحبــــــــــه
يا طفل يا للي ف دمي ناغا وحبــــــــا
علشان عيونك يا صغنن هويــــــــــــت
حتي ديدان الأرض و الأغربــــــــــــــة
عجبي !!!


فتحت شباكي لشمس الصبـــــــــــــــــاح
ما دخلش منه غيــــــــــر عويل الريـــاح
و فتحت قلبي عشان ابوح بالألـــــــــــــم
ما خرجش منه غير محبه و سمــــــــاح
عجبي !!!!


غمست سنك في السواد يا قلـــــــــــــــم
عشان ما تكتب شعر يقطر ألــــــــــــــــم
مالك جرالك إيه يا مجنون ... و ليــــــــه
رسمت ورده وبيت و قلب و علـــــــــــم
عجبي !!


انا الذي عمري اشتياق في اشتيـــاق
و قطر داخل في محطة الـــــــــفراق
قصدت نبع السم وشربت ســـــــــم
من كتر شوقي وعشمي في التريـــاق
عجبي !!!


انا الذي عشت الزمن مضيعـــــــــه
بروح حزينة معفنة مضعضعــــــه
زرعتشجرة سنط لجل انجــــــرح
لقتها شعر البنت و مفرعــــــــــــه
عجبي !!


لو فيه سلام في الأرض وطمان و أمن
لو كان مفيش و لا فقر و لا خوف جبن
لو يملك الانسان مصير كل شـــــــــــئ
انا كنت اجيب للدنيا ميت ألف ابــــــــــن
عجبي !!


العشب طاطا للنسايم و نـــــــــــــــــــــخ
أخضر طري مالهش في الحســـــــن أخ
عصفور عبيط انا .. غاوي بهجه و غنا
ح انزل هنا.. و انشا لله يهبرني فــــــــخ
عجبي !!


مرغم عليك يا صبح مغصوب يا ليل
لا دخلتها برجليا ولا كان لى ميل
شايلنى شيل دخلت أنا الحياة
وبكره ح أخرج منها شايلنى شيل
عجبى !



مع إن كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين
عجبى !!



عجبى عليك .. عجبى عليك يا زمن
يا بو البدع يا مبكى عين دماً
إزاى أنا أختار لروحى طريق
وأنا اللى داخل فى الحياة مرغماً
عجبى !!



وأنا فى الضلام .. من غير شعاع يهتكه
أقف مكانى بخوف ولا أتركه
ولما ييجى النور واشوف الدروب
أحتار زيادة .. أيهم أسلكه ؟
عجبى !!



نظرت فى الملكوت كتير وانشغلت
وبكل كلمة (ليه ؟) و(عشانيه) سألت
اسأل سؤال .. الرد يرجع سؤال
واخرج وحيرتى أشد مما دخلت
عجبى !!



غدر الزمان يا قلبى مالهوش أمان
وحاييجى يوم تحتاج لحبة إيمان
قلبى ارتجف وسألنى .. أأمن بإيه ؟
أأمن بإيه محتار بقالى زمن
عجبى !!



قالوا الشقيق بيمص دم الشقيق
والناس ما هياش ناس بحق وحقيق
قلبى رميته وجبت غيره حجر
داب الحجر .. ورجعت قلبى رقيق
عجبى !!


يوم قلت آه .. سمعونى قالوا فسد
ده كان جدع قلبه حديد واتحسد
رديت على اللايمين أنا وقلت .. آه
لو تعرفوا معنى زئير الأسد
عجبى !!


بين موت وموت .. بين النيران والنيران
ع الحبل ماشيين الشجاع والجبان
عجبى علادى حياة .. ويا للعجب
إزاى أنا ـ يا تخين ـ بقيت بهلوان
عجبى !!


أنا قلبى كان شخشيخة أصبح جرس
جلجلت به صحيوا الخدم والحرس
أنا المهرج .. قمتو ليه خفتو ليه
لاف إيدى سيف ولا تحت منى فرس
عجبى !!


دخل الربيع يضحك لقانى حزين
نده الربيع على إسمى لم قلت مين
حط الربيع أزهاره جنبى وراح
وإيش تعمل الأزهار للميتين
عجبى !!


مهبوش بخربوش الألم والضياع
قلبى ومنزوع م الضلوع انتزاع
يا مرايتى يا اللى بترسمى ضحكتى
يا هلترى ده وش والا قناع
عجبى !!


حبيت .. لكن حب من غير حنان
وصاحبت لكن صحبه ما لهاش أمان
رحت لحكيم واكتر لقيت بلوتى
إن اللى جوه القلب مش ع اللسان
عجبى !!


يا عندليب ماتخافش من غنوتك
قول شكوتك و احكي عن بلوتك
الغنوة مش هتموتك إنما
كتم الغنا هو اللي هيموتك
!عجبى


أوصيك يا ابني بالقمر و بالزهور
أوصيك بليل القاهرة المسحور
و إن جيت في بالك ... اشتري عقد فل
لأي سمرا ... و قبري إوعك تزور
!عجبي


حاسب من الاحزان و حاسب لها حاسب على رقابيك من حبلها
راح تنتهى و لابد راح تنتهى مش انتهت احزان من قبلها
عجبى


ولدي نصحتك لما صوتي اتنبح
ما تخفش من جني و لا من شبح
و ان هب فيك عفريت قتيل إسأله
ما دافعش ليه عن نفسه يوم ما اندبح
عجبى


لا تجبر الانسان ولا تخيره
تكفيه ما فيه من عقل بيحيره
اللى انهارده يطلبه يرضاه
هوه اللى بكره هيشتهى يغيره
عجبى


عبسا بقول و اقرا فى سوره عبس
متلومشى حد ان ابتسم او عبس
فى ناس تقول الهزل يطلع جد
وناس تقول الجد يطلع عبس
عجبى


أنا اللي بالأمر المحال اغتوى
شفت القمر نطيت لفوق ف الهوا
طلته ما طلتوش إيه انا يهمنى
وليه ما دام بالنشوة قلبي ارتوى
عجبى


عينى رأت مولود على كتف أمه
يصرخ تهنن فيه يصرخ تضمه
يصرخ تقول يابنى متنطق كلام
ده اللى ميتكلمش يا كتر همه
عجبى


مرات أفوق و يحل عني غبايا
و أفتكر إني فهمت كل الخبايا
و افتح شفايفي عشان أقول الدرر
ما قولش غير حبة غزل في الصبايا
و عجبي.



اسف على الاطالة واتمنى يكون عجبكم... [/size]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
gassy
اسكندرانى جديد
اسكندرانى جديد
avatar


مُساهمةموضوع: رد: رباعيات صلاح جاهين   الجمعة فبراير 05, 2010 3:34 pm

بجد ميرسى اوى يامحمود على الرباعيات الجامده دى انا بحبه جدا
تسلم ايدك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
mahmoudherooo
اسكندرانى جديد
اسكندرانى جديد
avatar


مُساهمةموضوع: رد: رباعيات صلاح جاهين   السبت فبراير 06, 2010 3:37 pm

اللة يسلمك
شكرا

على مرورك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
andyfay
عضو سوبر
عضو سوبر



مُساهمةموضوع: رد: رباعيات صلاح جاهين   الأحد فبراير 07, 2010 3:18 pm

اراهنك يا محمود على مليار جنيه
ان ياسمين مفرتهاش
هههههههههههههههههههههههه
مش صح يا ياسمين
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
gassy
اسكندرانى جديد
اسكندرانى جديد
avatar


مُساهمةموضوع: رد: رباعيات صلاح جاهين   الأحد فبراير 07, 2010 3:34 pm

لا قريتهم ياعمرو ادي لمحمود المليار جنيه بقا
اوعى تسيب حقك يامحمود عشان انت اللى كسبت الرهان
ههههههههههههههه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
mahmoudherooo
اسكندرانى جديد
اسكندرانى جديد
avatar


مُساهمةموضوع: رد: رباعيات صلاح جاهين   الإثنين فبراير 08, 2010 1:49 am

معلش يا ياسمين المسامح كريم
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
رباعيات صلاح جاهين
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
إسكندرانى :: المنتدى الادبى :: قصص واشعار-
انتقل الى: